Pastrimi i kripërave të tualetit është një ndër detyrat më të lodhshme të mirëmbajtjes së shtëpisë, kërkon durim, përkushtim dhe shpeshherë edhe shumë produkte kimike. Por nëse jeni në kërkim të një zgjidhjeje më të thjeshtë, më natyrale dhe më miqësore me mjedisin, përgjigjja është limoni.
Ky frut i zakonshëm, i njohur për vetitë e tij dezinfektuese dhe aromën e freskët, mund të bëjë mrekulli në përballjen me një nga problemet më të zakonshme të banjës, gurin gëlqeror që krijohet nga uji i fortë. Ky i fundit përmban nivele të larta mineralesh si kalciumi dhe magnezi, të cilët krijojnë depozita të bardha dhe të ashpra mbi rubineta, pllaka dhe kokën e dushit.
Acidet natyrale të limonit, kryesisht acidi citrik, reagojnë me karbonatin e kalciumit, përbërësi kryesor i kripërave, duke e shpërbërë dhe duke e lehtësuar pastrimin. E gjitha kjo pa përdorur detergjentë të ashpër dhe pa lënë pas mbetje kimike.
Përdorimi praktik në banjë
1.Rubineta dhe koka dushi: Prisni një limon në dysh dhe fërkoni zonat e prekura. Për pastrim më të thellë, vendosni feta limoni në kokën e dushit, mbështilleni me një qese plastike dhe lëreni për të paktën 30 minuta. Më pas, shpëlajeni me ujë të nxehtë.
2.Xhami i kabinës së dushit: Fërkojeni direkt me limon dhe pas disa minutash shpëlajeni. Do të largojë njollat e bardha dhe do të lërë një shkëlqim natyral.
3.Pllaka dhe nyje: Edhe pse kripërat nuk janë gjithmonë të dukshme në këto zona, përdorimi i limonit parandalon grumbullimin e tyre dhe ndihmon në ruajtjen e pastërtisë.
Përdorimi i limonit nuk është vetëm efektiv, por edhe ekologjik. Ndryshe nga kimikatet agresive, limoni është një produkt natyral që nuk dëmton kafshët shtëpiake, bimët apo ajrin që thithni në banjë. Ai është një shembull i pastër i asaj se si mund të kujdesemi për shtëpinë dhe planetin njëkohësisht.
